اسلام آباد: ملک میں کورونا وائرس کیسز میں ریکارڈ اضافہ جاری ہے اور گزشتہ 24 گھنٹوں میں ریکارڈ 6472 نئے کیسز رپورٹ ہوئے ہیں جس کے بعد ملک بھر میں کورونا کیسز کی مجموعی تعداد ایک لاکھ 32 ہزار 798 ہوگئی۔
نیشنل کمانڈ اینڈ آپریشن سینٹر کے جاری کردہ اعداد و شمار کے مطابق گزشتہ 24 گھنٹوں کے دوران ملک بھر میں سب سے زیادہ 29 ہزار 8 سو 50 کورونا ٹیسٹ کئے گئے، اس طرح ملک بھر میں اب تک آٹھ لاکھ 39 ہزار سے زائد کورونا ٹیسٹ کئے جا چکے ہیں۔
این سی او سی کے مطابق 24 گھنٹوں میں ریکارڈ 6472 نئے کیسز رپورٹ ہوئے ہیں جس کے بعد ملک بھر میں کورونا کیسز کی مجموعی تعداد ایک لاکھ 32 ہزار 798 ہوگئی۔
پنجاب میں کورونا کیسز کی تعداد سب سے زیادہ ہے اور مصدقہ مریضوں کی تعداد 50 ہزار سے تجاوز کر گئی ہے، ملک کے سب سے بڑے صوبے میں کوویڈ 19 کے مصدقہ مریضوں کی تعداد 50 ہزار 87 ہوگئی ہے۔ سندھ میں 49 ہزار 256، خیبرپختونخوا میں 16 ہزار 415، بلوچستان میں 7 ہزار 866، اسلام آباد میں 7 ہزار 163، آزادکشمیر میں 574 اور گلگت بلتستان میں ایک ہزار 44 کیسز رپورٹ ہوئے ہیں۔
نیشنل کمانڈ اینڈ آپریشن سینٹر کے مطابق 24 گھنٹوں میں کورونا مزید 88 زندگیاں نگل گیا ہے، اس طرح ملک میں کورونا سے مرنے والوں کی تعداد 2 ہزار551 ہوگئی ہے، پنجاب میں کورونا سے اموات کی تعداد 938 ہوگئی، اس کے علاوہ سندھ میں 793، خیبر پختونخوا میں 642، بلوچستان میں 80 ، اسلام آباد میں 71، آزاد کشمیر میں 11 اور گلگت بلتستان میں 16 مصدقہ مریض جان کی بازی ہار چکے ہیں۔
کس صوبے میں کتنے وینٹی لیٹرز
این سی او سی کے مطابق پنجاب میں 9 ہزار276 بیڈز، 3 ہزار 500 آکسیجن اور 387 وینٹی لیٹر مختص ہیں جب کہ کورونا کے 233 مریض وینٹی لیٹر پر موجود ہیں۔ سندھ میں 8 ہزار 274 بیڈز، 739 آکسیجن بیڈز، 368 وینٹی لیٹر دستیاب ہیں جب کہ کورونا کے 83 مریض وینٹی لیٹر پر ہیں۔
آزاد کشمیر میں کورونا مریضوں کے لیے 379 بیڈز، 68 آکسیجن بیڈز اور 43 وینٹی لیٹر دستیاب ہیں جب کہ کورونا کا کوئی مریض وینٹی لیٹر پر نہیں۔ اسی طرح گلگت بلتستان میں 151 بیڈز ، 43 آکسیجن بیڈز اور 28 وینٹی لیٹر دستیاب ہیں جب کہ کورونا کا ایک مریض وینٹی لیٹر پر ہے۔
خیبر پختونخوا کورونا کے مریضوں کے لیے 4 ہزار 856 بیڈز، ایک ہزار 81 آکسیجن بیڈز اور 340 وینٹی لیٹر مختص کئے گئے ہیں جب کہ کورونا کے 85 مریض وینٹی لیٹر پر موجود ہیں، اسلام آباد میں کورونا مریضوں کے لیے 514 بیڈز ، 262 آکسیجن بیڈز اور 90 وینٹی لیٹر دستیاب ہیں جب کہ کورونا کے 18 مریض وینٹی لیٹر پر ہیں،بلوچستان میں کورونا مریضوں کے لیے 2 ہزار 148 بیڈز، 262 آکسیجن بیڈز ور 36 وینٹی لیٹر دستیاب ہیں جب کہ بلوچستان میں کورونا کا کوئی مریض تاحال وینٹی لیٹر پر نہیں۔
کورونا وائرس اور احتیاطی تدابیر:
کورونا وائرس کے خلاف یہ احتیاطی تدابیر اختیار کرنے سے اس وبا کے خلاف جنگ جیتنا آسان ہوسکتا ہے۔ صبح کا کچھ وقت دھوپ میں گزارنا چاہیے، کمروں کو بند کرکے نہ بیٹھیں بلکہ دروازہ کھڑکیاں کھول دیں اور ہلکی دھوپ کو کمروں میں آنے دیں۔ بند کمروں میں اے سی چلاکر بیٹھنے کے بجائے پنکھے کی ہوا میں بیٹھیں۔
سورج کی شعاعوں میں موجود یو وی شعاعیں وائرس کی بیرونی ساخت پر ابھرے ہوئے ہوئے پروٹین کو متاثر کرتی ہیں اور وائرس کو کمزور کردیتی ہیں۔ درجہ حرارت یا گرمی کے زیادہ ہونے سے وائرس پر کوئی اثر نہیں ہوتا لیکن یو وی شعاعوں کے زیادہ پڑنے سے وائرس کمزور ہوجاتا ہے۔
پانی گرم کرکے تھرماس میں رکھ لیں اور ہر ایک گھنٹے بعد آدھا کپ نیم گرم پانی نوش کریں۔ وائرس سب سے پہلے گلے میں انفیکشن کرتا ہے اور وہاں سے پھیپھڑوں تک پہنچ جاتا ہے، گرم پانی کے استعمال سے وائرس گلے سے معدے میں چلا جاتا ہے، جہاں وائرس ناکارہ ہوجاتا ہے۔
بشکریہ ایکسپریس نیوز
About The Author
