370

سام سنگ گیلکسی ’فولڈ فون‘ اس جمعے کو ریلیز کیا جائے گا

سام سنگ کے اپنے فولڈ ہوجانے والے انقلابی فون میں بعض نقائص دور کرنے کے بعد کہا ہے کہ آخر کار تہہ ہوکر بند ہوجانے والا اسمارٹ فون جمعہ 27 ستمبر کو پہلے امریکا میں فروخت کےلیے پیش کیا جارہا ہے۔

اس فون کو کیریئر پر اے ٹی اینڈ ٹی پیش کرے گا جبکہ دوسرا ورژن ان لاک ہوگا۔ امریکا میں یہ پہلی مرتبہ سلیکٹ، اے ٹی اینڈ ٹی اور بیسٹ بائے کے اسٹورز پر آن لائن دستیاب ہوگا۔ اس کی قیمت 1980 ڈالر رکھی گئی ہے جبکہ یہ فائیو جی کی سپورٹ بھی رکھتا ہے۔

اس کےلیے ڈیزائن میں معمولی تبدیلیاں کی گئی ہیں اور ان کی تفصیلات بعض صحافیوں کے سامنے پیش کی گئی ہیں۔ ان میں سب سے اہم تبدیلی اسکرین پروٹیکٹر بھی ہے۔ کمپنی سے وابستہ زیک نیلسن نے کہا ہے کہ اسے ہر طرح کے ٹیسٹ سے گزارا گیا ہے اور یہ دیرپا اور مضبوط ہے۔ ساتھ ہی کھولنے اور بند کرنے کے عمل میں اسکرین پرلگنے والے نشانات کا مسئلہ بھی حل کردیا گیا ہے۔

امریکا میں گیلکسی فولڈ فون کا شدت سے انتظار کیا جارہا تھا۔ اس کے علاوہ سام سنگ ایک پریمیئر سروس بھی شروع کررہا ہے ۔ اس کے تحت گیلکسی فولڈ کے ہر خریدار کو سام سنگ کے ماہر کے ساتھ بیٹھنے اور بات کرنے کا موقع بھی ملے گا جو انہیں مفید مشوروں، سافٹ ویئر اور ایپس سے آگاہ کرے گا۔

اس کےعلاوہ صارفین ایک ایپ، ویب سائٹ اور فون لائن کے ذریعے بھی مدد حاصل کرسکیں گے۔ بہت سے تجزیہ کاروں کا خیال تھا کہ سام سنگ اس ضمن میں خاص گارنٹی بھی دے گا لیکن اس کا کوئی اعلان نہیں کیا گیا۔

اگرچہ گیلکسی فولڈ کو دوبارہ لانچ کیا گیا ہے تاہم اس بار عوام نے اس سے زیادہ توقعات وابستہ کررکھی ہیں۔

اس خبر پر اپنی رائے کا اظہار کریں