گلگت (نامہ نگار) انسانی حقوق کے فورم کے زیرِ اہتمام منعقدہ ایک پروگرام سے خطاب کرتے ہوئے معروف سماجی و سیاسی رہنما اسلم انقلابی نے کہا کہ اس تقریب میں نوجوانوں کی بھرپور شرکت اس بات کا واضح ثبوت ہے کہ گلگت بلتستان کا نوجوان طبقہ سماجی اور سیاسی شعور رکھتا ہے اور اپنے مستقبل کے بارے میں سنجیدہ ہے۔
انہوں نے کہا کہ نوجوان اس خطے کی حقیقی قوت ہیں، تاہم جب تک انہیں جدید تقاضوں کے مطابق وسائل، تربیت اور عملی مواقع فراہم نہیں کیے جاتے، وہ قومی یا بین الاقوامی سطح پر اپنے خطے کی نمائندگی مؤثر انداز میں نہیں کر سکیں گے۔
اسلم انقلابی نے زور دیا کہ نوجوانوں کو ایک مضبوط بنیاد فراہم کرنے کے لیے مقامی سیاسی جماعتوں کی تنظیمِ نو اور انہیں فعال بنانا وقت کی ضرورت ہے، تاکہ نوجوان اپنی صلاحیتوں کو درست پلیٹ فارم کے ذریعے بروئے کار لا سکیں۔
انہوں نے نوجوانوں پر زور دیا کہ وہ مثبت سوچ، شعوری جدوجہد اور منظم طریقے سے اپنے حق کے لیے آواز بلند کریں۔
