گلگت/اسلام آباد (رہبر نیوز)جعفریہ اسٹوڈنٹس آرگنائزیشن پاکستان کے مرکزی انتخابات میں سید محمد فتح رضوی کو دو سالہ مدت (2025 تا 2027) کے لیے تنظیم کا مرکزی صدر منتخب کر لیا گیا۔ سید محمد فتح رضوی کا تعلق گلگت کے علاقے سکوار سے ہے۔
یہ انتخاب مرکزی جعفریہ طلباء کنونشن کے دوران عمل میں آیا، جس میں ملک بھر سے آئے ہوئے طلباء، صوبائی نمائندگان اور ضلعی صدور نے شرکت کی۔ انتخابی عمل منظم، شفاف اور پُرامن ماحول میں مکمل ہوا۔
نو منتخب صدر کے اعلان کے بعد شرکاء نے سید محمد فتح رضوی کا والہانہ استقبال کیا۔ اس موقع پر مرکزی سیکرٹری جنرل علامہ شبیر حسن میثمی نے نومنتخب صدر سے حلف لیا اور کہا کہ جعفریہ اسٹوڈنٹس آرگنائزیشن پاکستان ملتِ جعفریہ کے نوجوانوں کی فکری، تعلیمی اور اخلاقی تربیت کا مؤثر پلیٹ فارم ہے۔
علامہ شبیر حسن میثمی نے اس توقع کا اظہار کیا کہ نو منتخب صدر نظریاتی استقامت، تعلیم کے فروغ اور طلباء کے حقوق کے تحفظ کے لیے بھرپور کردار ادا کریں گے۔
اپنے پہلے خطاب میں سید محمد فتح رضوی نے تنظیم کے بانیان کے مشن اور قائد ملتِ جعفریہ پاکستان آیت اللہ سید ساجد علی نقوی کی رہنمائی میں طلباء کے دینی و فکری شعور کو مزید اجاگر کرنے کے عزم کا اظہار کیا۔
انہوں نے تمام صوبائی و ضلعی ذمہ داران کا شکریہ ادا کرتے ہوئے کہا کہ وہ اتحاد، نظم و ضبط اور نظریاتی بیداری کو تنظیم کا بنیادی شعار بنائیں گے۔
