ہم میں سے بہت لوگ گرین ٹی یعنی سبز چائے کا استعمال کرتے ہیں، گرین ٹی پینا آپ کی صحت کے لیے نہایت ہی فائدے مند ہے لیکن اس کے ساتھ ہی گرین ٹی ہماری جلد کے لیے بھی بہت ہی بہترین تصور کی جاتی ہے۔
زیادہ تر لوگ گرین ٹی کو پینا پسند کرتے ہیں مگر ہم آپ کو یہ بتائیں گے کہ کیسے گرین ٹی کا چہرے پر استعمال آپ کی جلد کو تروتازہ اور چمکدار بناتا ہے۔
گرین ٹی کو مندرجہ ذیل طریقے سے جلد پر استعمال کیا جاسکتا ہے۔
1. گرین ٹی ماسک
گرین ٹی کا فیس ماسک بنا کر استعمال کیا جائے تو یہ جلد کے لیے بہت فائدے مند ہوگا۔ فیس ماسک بنانے کے لیے ایک بڑا چمچ باریک پسی ہوئی گرین ٹی لیجیے پھر اس میں 2چٹکی ہلدی اور ایک بڑا چمچ بیسن ڈال لیجیے۔
ان تمام چیزوں کو پانی کی مدد سے پیسٹ بنا کر چہرے پر لگائیں اور جب یہ ماسک خشک ہوجائے تو چہرہ دھولیں، ایسا ہفتے میں دو بار کرنے سے جلد چمکدار ہوجائے گی۔
2. گرین ٹی اسکرب
ہمارے چہرے پر روزانہ دھول مٹی اور گرد جمع ہوجاتی ہے جو کہ چہرے کے مسام کو بند کردیتی ہے، چہرے کو تازہ کرنے کے لیے اسکرب کرنا نہایت ہی ضروری ہے۔
گرین ٹی کا اسکرب بنانے کے لیے سب سے پہلے گرین ٹی کے پتوں کو پانی میں اُبال لیجیے، جب یہ اچھی طرح اُبل جائیں تو پانی کو چھان کر پتوں سے علیحدہ کر لیجیے۔ گرین ٹی کے پانی میں چینی ڈال کر اسے چہرے پر ہلکے ہاتھ سے مساج کیجیے، یہ ایک ایسا نیچرل اسکرب ہے جس سے آپ کے چہرے کے مسام میں موجود تمام گندگی صاف ہوجائے گی۔
3. گرین ٹی سے آنکھوں کے گرد ہلکوں کا علاج
گرین ٹی آنکھوں کے گرد ہلکوں کے لیے بہت معاون ثابت ہوتی ہے، ہلکوں کے لیے آپ گھر میں موجود گرین ٹی بیگز کو استعمال کرنے کے بعد فریج میں رکھ دیجیے جب یہ ٹھنڈے ہو جائیں تو انہیں آنکھوں پر رکھیں ، ایسا کرنے سے آنکھوں کے گرد ہلکے اور سوجن بھی ختم ہوجاتی ہے۔
4. گرین ٹی اسکن ٹونر
ہمیں اپنی جلد کو تروتازہ رکھنے کے لیے ایک ٹونر کی ضرورت ہوتی ہے، مارکیٹ میں ملنے والے ٹونر کیمیکل سے بنتے ہیں جو کہ جلد کے لیے نقصان کا باعث بنتے ہیں۔
اگر آپ ایک نیچرل ٹونر کا استعمال کرنا چاہتے ہیں تو سب سے پہلے گرین ٹی کو پانی میں اُبال کر چھان لیجیے، پھر اس گرین ٹی میں ایلوویرا جیل شامل کرکے ایک اسپرے بوتل میں محفوظ کرکے فریج میں رکھ دیں۔ ہر تھوڑی دیر بعد اس ٹونر کو اپنے چہرے پر اسپرے کرنے سے جلد چمکدار اور ملائم ہوجائے گی۔
About The Author
