حکومتِ گلگت بلتستان کے قانون و استغاثہ ڈپارٹمنٹ نے ایک اہم نوٹیفکیشن جاری کرتے ہوئے صوبے کے تمام وزراء، مشیران، کوآرڈینیٹرز، خصوصی معاونین اور پارلیمانی سیکریٹریز کو ڈی نوٹیفائی کر دیا ہے۔ نوٹیفکیشن کے مطابق یہ اقدام 24 نومبر کی رات 12 بجے سے نافذ العمل ہو چکا ہے۔
محکمہ قانون کے مطابق یہ فیصلہ گلگت بلتستان اسمبلی سیکریٹریٹ کے مراسلے اور گلگت بلتستان گورننس ریفارمز 2019 کی شق 56(5) کے تحت کیا گیا، جسے گلگت بلتستان (انتخابات و نگران حکومت) ترمیمی آرڈر 2020 کے ذریعے نافذ کیا گیا تھا۔ جاری اعلامیے پر سیکریٹری قانون و استغاثہ سجاد حیدر کے دستخط موجود ہیں۔
نوٹیفکیشن کے تحت وزیرِ اعلیٰ کے تمام وزراء، مشیر، کوآرڈینیٹرز اور خصوصی معاونین آج سے اپنے عہدوں سے فارغ تصور ہوں گے۔ محکمہ قانون نے یہ نوٹیفکیشن سیکریٹری KA&GB اسلام آباد، سیکریٹری جی بی کونسل، تمام انتظامی سیکریٹریز، اکاؤنٹنٹ جنرل اور چیف سیکریٹری آفس سمیت متعلقہ اداروں کو ارسال کر دیا ہے۔
سرکاری اعلامیے کے اجرا کے بعد گلگت بلتستان میں نگران سیٹ اپ کی تشکیل کے لیے انتظامی ڈھانچے کی راہ ہموار ہو گئی ہے۔
