نگر(نمائندہ خصوصی) ضلع نگر کے علاقے نگر خاص تھول سے تعلق رکھنے والی 17 سالہ ثنہ کی طبی تشخیص کے بعد صنفی شناخت میں تبدیلی سامنے آئی ہے۔ والدین کے مطابق ثنہ کی پیدائش کے وقت اور ابتدائی برسوں میں ظاہری طور پر اسے لڑکی تصور کیا جاتا رہا اور وہ جسمانی طور پر بھی لڑکی کے طور پر ہی پروان چڑھتی رہی۔
والدین کا کہنا ہے کہ تقریباً چھ ماہ قبل بچے کی آواز میں اچانک تبدیلی محسوس ہوئی، جس پر تشویش کے باعث مختلف ڈاکٹرز سے رجوع کیا گیا۔ طبی معائنوں اور تین ماہ پر محیط رپورٹس کے بعد ماہر ڈاکٹروں نے بتایا کہ یہ ایک پیچیدہ طبی مسئلہ ہے جس کے لیے سرجری ناگزیر ہے۔
بعد ازاں لاہور کے ایک نجی ہسپتال میں کامیاب آپریشن کیا گیا، جہاں ڈاکٹروں نے طبی تشخیص کے بعد والدین کو آگاہ کیا کہ 17 سالہ ثنہ دراصل لڑکا ہے۔ والد کے مطابق اس طبی فیصلے کے بعد انہوں نے اللہ تعالیٰ کا شکر ادا کیا اور اپنے بیٹے کا نام رضا عباس رکھا۔
اہلِ علاقہ کی جانب سے بچے اور اس کے خاندان کے لیے نیک تمناؤں کا اظہار کیا جا رہا ہے، جبکہ والدین نے طبی ماہرین کا شکریہ ادا کرتے ہوئے کہا کہ وہ اب اپنے بچے کے بہتر مستقبل کے لیے پُرامید ہیں۔
105
