گلگت پیپلز یوتھ آرگنائزیشن گلگت ڈویژن کے سیکرٹری جنرل شاہد علی دانش نے حفیظ اور انور گروپ کی حالیہ سیاسی قربت کو شدید تنقید کا نشانہ بناتے ہوئے اسے کھلی موقع پرستی اور اصولوں کی نفی قرار دیا ہے۔
اپنے جاری کردہ بیان میں شاہد علی دانش نے کہا کہ وہ گروہ جو ماضی میں جعلی ڈگری رکھنے والے حفیظ حفیظ الرحمن کو صدر تسلیم کرنے سے انکار کرتا رہا، اور وہ انور گروپ جسے خود حفیظ الرحمن ماضی میں بلیک میلر قرار دیتے رہے، آج ایک دوسرے کے دفاع میں صف آرا نظر آ رہے ہیں۔ ان کے مطابق یہ اچانک قربت کسی نظریاتی ہم آہنگی کا نتیجہ نہیں بلکہ وقتی مفادات اور اقتدار کی سیاست کا شاخسانہ ہے۔
انہوں نے کہا کہ جب سیاست اصولوں، نظریات اور عوامی مفادات کے بجائے ذاتی فائدے اور وقتی ضرورتوں کے تابع ہو جائے تو عوام کا سیاست اور سیاسی قیادت سے اعتماد اٹھ جانا فطری امر بن جاتا ہے۔ محض ایک ملاقات میں اپنے تمام سابقہ مؤقف دفن کر دینا اس بات کا واضح ثبوت ہے کہ یہاں نظریہ نہیں بلکہ اقتدار کی سیاست کی جا رہی ہے۔
شاہد علی دانش کا کہنا تھا کہ حفیظ اور انور گروپ درحقیقت ایک ہی سیاسی روایت کے وارث ہیں، وہ روایت جو آمریت کے ادوار میں پروان چڑھی جہاں اصولوں کے بجائے مفاہمت، طاقت اور مفاد کو سیاست کا محور بنایا گیا۔ انہوں نے کہا کہ اگرچہ چہرے اور دعوے بدل گئے ہیں، مگر سیاست آج بھی اسی فرسودہ سوچ کے گرد گھوم رہی ہے۔
آخر میں انہوں نے کہا کہ اس طرزِ سیاست نے نہ صرف عوامی اعتماد کو ٹھیس پہنچائی ہے بلکہ گلگت بلتستان میں جمہوری اقدار کے مستقبل پر بھی سنگین سوالات کھڑے کر دیے ہیں۔
About The Author
