کراچی میں عمارت گرنے سے 10 افراد جاں بحق اور 32 زخمی ہوگئے۔
رضویہ سوسائٹی میں 5 منزلہ رہائشی عمارت گرگئی جس کے نتیجے میں متعدد افراد ملبے تلے دب گئے۔ ریسکیو ٹیمیں موقع پر پہنچیں تاہم تنگ گلیوں کے باعث امدادی کاموں میں انہیں مشکلات کا سامنا کرنا پڑا۔
ملبے سے اب تک 6 خواتین اور 2 بچوں سمیت 10 افراد کی لاشیں نکالی گئی ہیں اور 32 افراد زخمی ہیں جنہیں طبی امداد کے لیے اسپتال منتقل کردیا گیا ہے جہاں 6 کی حالت نازک بتائی جاتی ہے، جاں بحق ہونے والوں کی شناخت یحیی ولد خرم، حیدر ولد خرم ، خواتین میں مریم، حرا ولد عبدالرشید، ایک 40 سالہ خاتون، غلام مصطفی ولد عطا محمد سے ہوئی ہے۔
علاقہ مکین بھی اپنی مدد آپ کے تحت ملبہ ہٹانے میں مصروف ہیں، گرنے والی عمارت سے متصل عمارت بھی ٹیڑھی ہوگئی ہے اور اس کے گرنے کا خدشہ بھی ظاہر کیا جارہا ہے۔
اہل محلہ کے مطابق عمارت جمال فاطمہ نامی خاتون کی ملکیت ہے جنہوں نے 74 گز کے رقبے پر خستہ حال پرانے ستونوں پر یہ 5 منزلہ عمارت تعمیر کرائی تھی جس کی چھٹی منزل پر کچھ ماہ پیشتر ہی پینٹ ہاؤس بھی بنایا گیا۔ اس حادثے میں ڈاکٹر جمال فاطمہ کے ایک بیٹے کی ہلاکت کا بھی خدشہ ہے۔
وزیراعلی سندھ مراد علی شاہ نے واقعے کا نوٹس لیتے ہوئے کمشنر کراچی کو ملبے میں پھنسے ہوئے لوگوں کو نکالنے کی ہدایت کردی جب کہ پولیس کی نفری بھی موقع پر موجود ہے۔
دوسری جانب یوسف پلازہ تھانے کےعلاقے فیڈرل بی ایریا بلاک 16 میں واقع رہائشی عمارت عبداللہ سینٹر کا چھجا گرنے سے ایک شخص جاں بحق اور 3 بچوں سمیت 11 افراد زخمی ہو گئے، حادثے میں جاں بحق ہونے والا شخص فیکٹری ملازم اور فیڈرل بی ایریا کا رہائشی تھا۔
About The Author
