daily rehbar gb daily rahbar gilgit baltistan newspaper epaper of gilgit baltistan
صدر مملکت ڈاکٹر عارف علوی نے کشمیر کے یوم الحاق پاکستان پر پیغام دیتے ہوئے کہا کہ 19 جولائی 1947 کو پاکستان کے ساتھ کشمیر کے الحاق کی قرارداد منظور کی گئی۔
ڈاکٹر عارف علوی نے کہا کہ وہ دن دور نہیں جب مقبوضہ کشمیر کا پاکستان کے ساتھ الحاق ہوگا۔
صدرِ مملکت نے کہا کہ بھارت نے کشمیر پر غاصبانہ قبضہ کر رکھا ہے اور کشمیریوں پر مظالم ڈھا رہا ہے۔
انہوں نے کہا کہ پاکستان کشمیریوں پر بھارتی مظالم کے خلاف ہر عالمی فورم پر آواز اٹھا رہا ہے۔
عارف علوی نے کہا کہ مقبوضہ کشمیر میں انسانی حقوق کی سنگین خلاف ورزیوں پر عالمی سطح پر بھی آوازیں بلند ہو رہی ہیں۔
صدر مملکت نے کہا کہ عالمی برادری اقوام متحدہ کی قراردادوں پر عمل درآمد کرانے کے لیے اپنا کردار ادا کرے۔
وزیراعظم آزاد کشمیر راجا فاروق حیدر کا کہنا ہے کہ کشمیر کی عوام کا پاکستان کے ساتھ مذہبی اور ثقافتی الحاق ہے اس لیے کشمیری ریاست کا پاکستان سے الحاق ضروری ہے۔
راجا فاروق حیدر نے کانفرس سے خطاب کرتے ہوئے کہا کہ موجودہ پالیسی میں آپ 700 سال بھی لگے رہیں تو مسئلہ کشمیر حل نہیں ہوسکتا، ہمیں دنیا میں انصاف کے اداروں کے پاس جانا پڑے گا۔
انہوں نے کہا کہ جغرافیائی لسانی اور مذہبی اعتبار سے ریاست جموں و کشمیر پاکستان کا جزو ہے، 19جولائی کی قرارداد کو ریاست بھر کے عوام کی تائید حاصل تھی، قرارداد میں لکھا ہے کہ کشمیریوں کو اپنے نمائندے منتخب کرنے کا حق ہونا چاہیے۔
وزیراعظم آزاد کشمیر نے کہا کہ کشمیریوں نے اپنا فرض ادا کردیا، اب پاکستان کی ذمہ داری ہے، آزاد کشمیر حکومت اور حریت کانفرنس کو اپنا مقدمہ پیش کرنے کی اجازت دی جائے۔
راجا فاروق حیدر نے بتایا کہ حکومت پاکستان کو تجاویز ارسال کردی ہیں کہ کس طرح آگے بڑھا جاسکتا ہے، پاکستان کے عوام اور سیاسی قیادت کو آپس میں مل کر کشمیر پر کام کرنا ہوگا۔
وزیرِاعظم آزاد کشمیر نے کہا کہ بھارت کے انسانیت کے خلاف جرائم پر دنیا بھر کے ممالک میں کیس کریں گے، کشمیریوں کو بھارتی جیلوں میں نہیں رکھا جاسکتا، قید اور نظربند حریت رہنماؤں کو خراجِ تحسین پیش کرتا ہوں۔
About The Author
