ورکس ڈویژن ایجوکیشن ڈیپارٹمنٹ کے زیرِ انتظام “رتھ فاؤ انٹر کالج فار گرلز، سلطان آباد” منصوبے سے منسلک ٹھیکیدار کو اینٹی کرپشن اسٹیبلشمنٹ (ACE) نے گرفتار کر لیا۔
تفصیلات کے مطابق اینٹی کرپشن اسٹیبلشمنٹ گلگت بلتستان نے جاری تحقیقات کے دوران منصوبے میں مبینہ بے ضابطگیوں اور بدعنوانی کے شواہد ملنے پر متعلقہ ٹھیکیدار کو حراست میں لے لیا۔ گرفتار ملزم کو فوری طور پر ACE پولیس اسٹیشن منتقل کر دیا گیا جہاں اس کے خلاف درج ایف آئی آر کے بعد مزید تفتیش شروع کر دی گئی ہے۔
ذرائع کے مطابق اینٹی کرپشن اسٹیبلشمنٹ کی جانب سے اس کیس سے متعلق مزید شواہد اور متعلقہ افسران کے بیانات بھی قلمبند کیے جا رہے ہیں تاکہ منصوبے میں ہونے والی مبینہ کرپشن کے تمام پہلوؤں کو بے نقاب کیا جا سکے۔
ترجمان اینٹی کرپشن اسٹیبلشمنٹ نے کہا ہے کہ ادارہ گلگت بلتستان میں سرکاری منصوبوں میں شفافیت کو یقینی بنانے اور بدعنوان عناصر کے خلاف بلا امتیاز کارروائیاں جاری رکھے گا۔
