گلگت (خصوصی رپورٹ) سنٹرل جیل مناور کے زیرِ تکمیل پروجیکٹ کے 136 ملازمین گزشتہ چار ماہ سے تنخواہوں سے محروم ہیں۔ تنخواہوں کی عدم ادائیگی کے باعث ملازمین شدید ذہنی دباؤ اور معاشی مشکلات کا شکار ہو گئے ہیں۔ ذرائع کے مطابق، دور دراز علاقوں سے تعلق رکھنے والے کئی ملازمین گھریلو اخراجات پورے نہ ہونے کے سبب فاقہ کشی پر مجبور ہیں، جبکہ بعض کے بچے فیس ادا نہ کرنے کی وجہ سے اسکولوں سے نکال دیے گئے ہیں۔
متاثرہ ملازمین نے شکوہ کیا ہے کہ محکمہ جیل خانہ جات کی انتظامیہ اس سنگین صورتحال کے باوجود مکمل خاموشی اختیار کیے ہوئے ہے، جس سے ملازمین میں شدید مایوسی پھیل چکی ہے۔
ملازمین نے چیف سیکرٹری گلگت بلتستان اور ہوم سیکرٹری سے اپیل کی ہے کہ انسانی ہمدردی کے ناتے فوری طور پر تنخواہوں کی ادائیگی کے احکامات جاری کیے جائیں تاکہ یہ محنت کش اپنے اہل خانہ کے ساتھ باعزت زندگی گزار سکیں۔
About The Author
