گلگت (اسٹاف رپورٹ)پاکستان تحریک انصاف گلگت بلتستان نے نگران وزیر اعلیٰ کو کابینہ کی تشکیل کے حوالے سے سخت اور واضح پیغام جاری کرتے ہوئے مطالبہ کیا ہے کہ کسی بھی مذہبی انتہاپسند، سیاسی سہولت کار یا متنازعہ شخصیت کو نگران کابینہ کا حصہ نہ بنایا جائے۔
پی ٹی آئی جی بی کے صوبائی سیکرٹری فنانس، مراد علی نے اپنے بیان میں کہا ہے کہ اگر نگران کابینہ میں ایسے عناصر شامل کیے گئے جو جانبداری، انتہاپسندی یا سیاسی وابستگی کے سبب متنازع ہوں، تو یہ نگران انتظامیہ کی ساکھ اور غیرجانبداری پر سنگین سوالات کھڑے کرے گا، جو عوام کے اعتماد کے لیے نقصان دہ ہوگا۔
مراد علی کے مطابق، کسی بھی جانبدار یا سہولت کار فرد کی شمولیت کی صورت میں پی ٹی آئی گلگت بلتستان مسلسل 90 دن تک دھرنوں کا اعلان کرے گی، اور اس تمام تر صورتحال کی ذمہ داری نگران حکومت پر عائد ہوگی۔
انہوں نے واضح کیا کہ نگران حکومت کا بنیادی مقصد شفاف، غیرجانبدار اور منصفانہ ماحول فراہم کرنا ہے، نہ کہ مخصوص گروہوں یا افراد کو فائدہ پہنچانا۔
پی ٹی آئی نے نگران وزیر اعلیٰ سے اپیل کی ہے کہ خطے میں سیاسی استحکام اور ساکھ برقرار رکھنے کے لیے کابینہ کی تشکیل میں مکمل احتیاط اور شفافیت کو یقینی بنایا جائے۔
About The Author
