گلگت : صوبائی صدر تحریک انصاف جسٹس (ر) سید جعفر شاہ نے کہا ہے کہ وزیراعظم عمران خان نے اقوام متحدہ میں مسلم امہ کا بیانیہ پیش کرکے دنیا بھر کے مظلوم اور مصائب میں گرے ہوئے مسلمانوں کا دل جیت لیا ہے۔ انہوں نے کہا کہ وزیراعظم نے انڈیا اور مودی کا چہرہ دنیا میں بے نقاب کیا ہے اور کشمیریوں پر ڈھائے جانے مظالم پر عالمی ضمیر کو جھنجھوڑا ہے۔ وزیراعظم پاکستان نے کشمیریوں کی امید کو روشن کردیا ہے۔
اب مقبوضہ کشمیر میں آزادی کی تحریک کو ایک نئی روح ملے گی۔ دنیا بھر کے مسلمان پاکستان اور وزیراعظم عمران خان کےاقوام متحدہ میں اس دلیرانہ موقف اور امن پسندانہ رویے پر خراج تحسین پیش کررہے ہیں ۔ انہوں نے مزید کہا کہ بھارت جو دنیا میں بڑی جمہوریت کا ڈھونگ رچارہا ہے جبکہ پورے انڈیا میں اور بلخصوص مقبوضہ کشمیر میں انسانی حقوق کی صورتحال انتہائی مخدوش ہے ۔
ایسی صورتحال میں دنیا کو بھارت کا مکروہ اور ظالمانہ چہرہ دکھانا بہت ضروری تھا اور وزیراعظم پاکستان نے دنیا بھر کے مظلوموں بالخصوص مقبوضہ کشمیر کے مظلوم عوام کی بھرپور ترجمانی کی۔
انہوں نے مزید کہا کہ سعودی عرب، ایران،امریکہ اور افغانستان کےلیے وزیراعظم عمران خان امن کی امید بن کر ابھرے ہیں۔ خطے میں امن، ترقی اور غربت کے خاتمے کےلیے وزیراعظم عمران خان کا کردار تمام عالمی رہنماوں کےلیے قابل تقلید ہے
