صوبائی صدر اسلامی تحریک پاکستان شیخ میرزا علی نے الیکشن کمیشن گلگت بلتستان سے مطالبہ کیا ہے کہ صوبائی اسمبلی برائے 2026-2031 کے انتخابات کے جاری کردہ شیڈول پر نظرِ ثانی کی جائے، کیونکہ جنوری میں سخت موسمی حالات کے باعث ووٹنگ ٹرن آؤٹ نہایت کم رہنے کا خدشہ ہے۔
اپنے اخباری بیان میں شیخ میرزا علی نے کہا کہ الیکشن کمیشن آف گلگت بلتستان نے دوسری مرتبہ انتخابی شیڈول جاری کرتے ہوئے پولنگ عملے کی تعیناتی بھی کر دی ہے، تاہم موجودہ موسمی صورتحال میں بھرپور اور مؤثر انتخابات کا انعقاد ممکن نظر نہیں آتا۔ انہوں نے کہا کہ انتخابات کا انعقاد جمہوریت کی بنیاد ہے، مگر اس کے ساتھ ووٹروں کی پولنگ اسٹیشن تک رسائی اور آگاہی مہم بھی الیکشن کمیشن کی بنیادی ذمہ داریوں میں شامل ہے۔
انہوں نے مزید کہا کہ دنیا کی اکثریتی آبادی جمہوریت کو معاشرتی نظم و نسق کا بہترین ذریعہ سمجھتی ہے، جس کی بنیاد حقِ رائے دہی ہے، اور وہی معاشرے کامیاب ہوتے ہیں جہاں ووٹنگ ٹرن آؤٹ زیادہ ہو۔ ان کے مطابق جنوری اور فروری میں شدید سردی اور گرم علاقوں کی طرف ہجرت کے باعث ووٹرز کی بڑی تعداد حقِ رائے دہی استعمال کرنے سے محروم رہ سکتی ہے۔
شیخ میرزا علی نے تجویز دی کہ ماہِ رمضان کے بعد انتخابات کرانے سے بہتر نتائج سامنے آ سکتے ہیں، جس سے نہ صرف ووٹرز کو اپنے امیدوار کے انتخاب کے لیے مناسب وقت میسر آئے گا بلکہ ووٹنگ ٹرن آؤٹ بھی خاطر خواہ رہے گا۔ انہوں نے چیف الیکشن کمشنر سے اپیل کی کہ عوامی مفاد اور جمہوری عمل کے استحکام کے لیے انتخابی شیڈول پر ازسرِنو غور کیا جائے۔
