محکمہ اطلاعات اور گلگت بلتستان نیوز پیپرز سوسائٹی کے مابین اس بات پہ اتفاق پایا کہ منفی پروپیگنڈے کی حوصلہ شکنی، مثبت رجحان کے فروغ، قومی بیانیہ کی مؤثر تشہیر اور ریاست مخالف بیانیے کی حوصلہ شکنی کے لیے مشترکہ کاوشیں کی جائیں گی۔
ارشد علی کی زیر صدارت ایک وفد نے ڈپٹی ڈائریکٹر محکمہ اطلاعات فاروق احمد سے ملاقات کی اور انہیں دوبارہ ذمہ داریاں سنبھالنے پر مبارکباد دی۔ اس موقع پر وفد نے فاروق احمد کو نیک خواہشات کا اظہار کرتے ہوئے امید ظاہر کی کہ ان کی قیادت میں محکمہ اطلاعات اور میڈیا کے درمیان روابط مزید مضبوط ہوں گے۔
ملاقات کے دوران مفادِ عامہ کے فروغ، مثبت صحافتی رجحانات کے فروغ، منفی پروپیگنڈے کی روک تھام اور ریاستی بیانیے کے مؤثر ابلاغ کے لیے باہمی تعاون بڑھانے پر تفصیلی تبادلۂ خیال کیا گیا۔ اس بات پر بھی اتفاق ہوا کہ معاشرے میں تعمیری صحافت کے فروغ اور عوام کو درست معلومات کی بروقت فراہمی کے لیے میڈیا اور محکمہ اطلاعات مشترکہ حکمت عملی کے تحت کام کریں گے تاکہ گلگت بلتستان میں صحافت کے مثبت کردار کو مزید مستحکم کیا جا سکے۔
ڈپٹی ڈائریکٹر اطلاعات فاروق احمد نے وفد کا شکریہ ادا کرتے ہوئے اس عزم کا اظہار کیا کہ محکمہ اطلاعات صحافتی اداروں کے ساتھ قریبی روابط قائم رکھے گا اور معلومات کی بروقت فراہمی کو یقینی بنایا جائے گا تاکہ عوام تک مستند اور درست معلومات کی ترسیل ممکن بنائی جا سکے۔
43
