سید علی خامنہ ای کی شہادت پر گلگت بلتستان میں شدید ردعمل
سکردو میں جلاؤ گھیراؤ واقعات، کرفیو نافذ انجمنِ امامیہ کا 40 روزہ سوگ کا اعلان
گلگت بلتستان میں سید علی خامنہ ای کی شہادت کی خبر کے بعد فضا سوگوار اور کشیدہ ہو گئی۔ مختلف اضلاع میں احتجاجی مظاہرے، ریلیاں اور شٹر ڈاؤن دیکھنے میں آئے جبکہ کئی علاقوں میں حالات بے قابو ہو گئے۔
سکردو میں مظاہرین کی جانب سے متعدد سرکاری و نجی عمارتوں کو نذرِ آتش کیے جانے کی اطلاعات موصول ہوئیں۔ ذرائع کے مطابق اقوامِ متحدہ کے ذیلی دفتر، آغا خان رورل سپورٹ پروگرام (اے کے آر ایس پی) آفس، آرمی پبلک اسکول، ایس ٹی پی اور ایس پی آفس کو آگ لگائی گئی۔ صورتحال کی سنگینی کے پیش نظر ضلعی انتظامیہ نے سکردو میں فوری طور پر کرفیو نافذ کر دیا اور سیکیورٹی اداروں کی اضافی نفری تعینات کر دی گئی۔
دوسری جانب گلگت میں ناد علی چوک سکوار اور دنیور کے علاقوں میں امریکہ اور اسرائیل کے خلاف احتجاجی مظاہرے جاری ہیں۔ مرکزی امامیہ مسجد سے جٹیال میں قائم یو این دفتر کی جانب لانگ مارچ کی کال بھی دی گئی ہے جس کے باعث شہر میں کشیدگی پائی جا رہی ہے۔
صوبے کے مختلف شہروں میں دکانیں بند ہیں اور سڑکوں پر غیر معمولی سناٹا دیکھا گیا۔ مجموعی طور پر گلگت بلتستان بھر میں سوگ کی فضا قائم ہے۔
انجمنِ امامیہ گلگت بلتستان کی جانب سے 40 روزہ سوگ کا اعلان بھی کیا گیا ہے، جبکہ مذہبی و سیاسی قائدین نے کارکنان سے صبر و تحمل کا مظاہرہ کرنے اور پرامن احتجاج کی اپیل کی ہے۔
انتظامیہ کا کہنا ہے کہ حالات پر مسلسل نظر رکھی جا رہی ہے اور امن و امان کی بحالی کے لیے تمام ضروری اقدامات کیے جا رہے ہیں۔
68
