نگران وزیرِ اعلیٰ گلگت بلتستان جسٹس (ر) یار محمد کی زیرِ صدارت سپیشل اپیکس کمیٹی کا ایک اہم اجلاس اپیکس کمیٹی روم، جوٹیال گلگت میں منعقد ہوا۔ اجلاس میں کمانڈر ایف سی این اے، وزیرِ داخلہ، چیف سیکرٹری، انسپکٹر جنرل پولیس، سیکرٹری داخلہ اور دیگر سول، عسکری اور قانون نافذ کرنے والے اداروں کے نمائندوں نے شرکت کی۔
اجلاس میں گزشتہ دو روز کے دوران ہونے والے احتجاجی مظاہروں میں اشتعال انگیزی کے باعث ہونے والے جانی و مالی اور سرکاری املاک کو پہنچنے والے نقصان سے متعلق اداروں نے اپنی رپورٹس پیش کیں۔
اجلاس کے دوران شر پسند عناصر کی جانب سے مظاہرین کے صفوں میں گھس کے دہشتگردی کی کاروائیوں جس کے نتیجے میں قانون نافذ کرنے والے اہلکاروں کے قیمتی جانوں کے ضیاں اور فوجی چوکیوں اور کیمپوں پر حملوں کے نتیجے میں املاک کو نقصان ہونے پر گہرے دکھ اور افسوس کا بھی اظہار کیا گیا۔
اجلاس میں گلگت بلتستان کی مجموعی سیکیورٹی اور انتظامی اقدامات کا جائزہ لیا گیا اور تمام اداروں کو ہدایت کی گئی کہ باہمی ہم آہنگی کے ساتھ مؤثر اقدامات کو یقینی بنایا جائے۔
موجودہ سیکیورٹی صورتحال کو کنٹرول کرنے کے لیے 2 مارچ سے نافذ کرفیو کا بھی جائزہ لیا گیا۔ اجلاس میں جوڈیشل کمیشن کے قیام پر بھی غور کیا گیا، جس کے ذریعے موجودہ سیکیورٹی حالات کو خراب کرنے والے شرپسند عناصر کی نشاندہی کی جائے گی۔ مزید برآں، سرکاری افراد اور املاک کو نقصان پہنچانے والوں کو قانون کے کٹہرے میں لایا جائے گا اور ریاستی رٹ ہر صورت برقرار رکھی جائے گی۔
اجلاس میں اس امر پر زور دیا گیا کہ امن و امان کے قیام، سرکاری تنصیبات کے تحفظ اور قانون کی عملداری پر کسی قسم کا سمجھوتہ نہیں کیا جائے گا۔ عوام کے جان و مال کے تحفظ اور گلگت بلتستان میں دیرپا امن کے قیام کے لیے ہر ممکن اقدام اٹھائے جائیں گے۔
About The Author
