نگرہار: افغانستان میں گزشتہ روز ہونے والے کار بم دھماکے میں ہلاک ہونے والوں میں انٹرنیشنل امپائر بسم اللہ جان شنواری بھی شامل ہیں۔
عالمی خبر رساں ادارے کے مطابق ننگرہار کے ضلعی گورنر کے دفتر پر کار بم دھماکے میں 15 افراد ہلاک ہوگئے تھے۔ دھماکے کی زد میں افغان کرکٹ بورڈ کی گاڑی بھی آگئی تھی۔
گاڑی میں افغانستان کی جانب سے انٹرنیشنل میچوں میں امپائرنگ کے فرائض انجام دینے والے بسم اللہ جان شنواری موجود تھے جو دھماکے میں شدید زخمی ہوگئے اور دوران علاج دم توڑ گئے تھے۔
بسم اللہ جان شنواری نے 7 دسمبر 2017 میں ڈیبیو کیا تھا اور مارچ 2020 میں آخری میچ کی امپائرنگ کی تھی، انہوں نے 6 ایک روزہ اور 6 ٹی ٹوئنٹی میچوں میں امپائر کے فرائض انجام دیئے۔
یہ خبر پڑھیں : افغانستان ؛ کار بم دھماکے ميں 15 افراد ہلاک اور 30 زخمی
واضح رہے کہ گزشتہ روز ننگرہار میں کار بم دھماکے میں 15 افراد ہلاک اور 30 سے زائد زخمی ہوگئے تھے، ہلاک ہونے والوں میں 7 شہری بھی شامل تھے۔ بعد ازاں دھماکے میں امپائر بسم اللہ جان شنواری کی ہلاکت کی بھی تصدیق ہوئی۔
بشکریہ ایکسپریس نیوز
