امن کا نوبل انعام، اقوام متحدہ کے ورلڈ فوڈ پروگرام کے نام

المی خبر رساں ادارے کے مطابق اقوام متحدہ کے ادارے ’’ورلڈ فوڈ پروگرام‘‘ کو جنگ زدہ علاقوں میں بھوک مٹانے میں کلیدی کردار ادا کرنے پر نوبل انعام برائے امن سے نوازا گیا ہے جس کا فیصلہ ناروے کی نوبیل کمیٹی نے کیا۔

ناروے کی نوبیل کمیٹی کی چیئرپرسن بیریٹ ریس اینڈرسن نے اوسلو کے نوبل انسٹی ٹیوٹ میں 2020 کے نوبل انعام برائے امن کا اعلان کیا جہاں کورونا وبا کے باعث حاضرین کی تعداد کو نہایت محدود رکھا گیا تھا۔

The @WFP has been awarded the 2020 #NobelPeacePrize for its efforts to combat hunger, for its contribution to bettering conditions for peace in conflict-affected areas and for acting as a driving force in efforts to prevent the use of hunger as a weapon of war and conflict.

— The Nobel Prize (@NobelPrize) October 9, 2020

ریئس اینڈرسن نے کہا کہ ڈبلیو ایف پی نے دنیا کی توجہ ان لاکھوں لوگوں کی جانب مرکوز کرائی جو بھوک کے خطرے سے دوچار ہیں یا ابھی بھوک و افلاس سے زندگی کی جنگ لڑ رہے ہیں جسے جنگ کے ہتھیار کے طور پر استعمال کیا جاتا تھا۔

نوبل کمیٹی کی چیئرپرسن نے مزید کہا کہ خوراک انسان کی بنیادی ضرورت ہے، دنیا بھر میں کئی بچے بھوک کا شکار ہیں۔ جنگ زدہ علاقوں میں حالت مزید خراب ہے ایسی صورت حال میں اقوام متحدہ کے اس ادارے نے بنیادی انسانی حقوق کے لیے بے مثال کام کیا۔

واضح رہے کہ گزشتہ برس نوبل انعام برائے امن 2019 کا اعزاز امن کاوشوں کے باعث دنیا کی توجہ کا مرکز بننے والے جواں سال اور پُر عزم ایتھوپیا کے وزیراعظم آبے احمد علی کے نام رہا تھا۔ انہوں نے پڑوسی ملک اریٹیریا کے ساتھ دہائیوں سے جاری دشمنی کو ختم کرنے میں کلیدی کردار ادا کیا تھا۔

بشکریہ ایکسپریس نیوز