انگلینڈ میں موجود بھارتی کرکٹ ٹیم میں بھی کورونا پھیلنے لگا

لندن: انگلینڈ میں موجود بھارتی وکٹ کیپر رشبھ پانٹ اور ٹرینر دیانند کورونا وائرس کا شکار ہوگئے ہیں۔

انگلینڈ اور بھارت کی کرکٹ ٹیموں کے درمیان 5 اگست سے 5 میچوں پر مشتمل ٹیسٹ سیریز کا آغاز ہورہا ہے جس کے لیے بھارتی کرکٹ ٹیم انگلینڈ کے بائیوسیکیور ببل میں موجود ہے لیکن اس کے باوجود کورونا وائرس نے بھارتی کرکٹ ٹیم پر حملہ کردیا ہے۔

کورونا وائرس کی نئی قسم ’ڈیلٹا ویرینٹ‘ انگلینڈ کے بعد بھارتی کرکٹ ٹیم کے کیمپ میں بھی گھس آیا ہے اور ابتدائی طور پر وکٹ کیپر بلے باز رشبھ پانٹ کا کورنا ٹیسٹ مثبت آیا حالانکہ وہ کورونا ویکسین بھی لگواچکے تھے۔
Got my first jab today. When you are eligible, please step up and get the vaccine. The sooner we do it, the sooner we can beat this Virus. pic.twitter.com/D8AC4WrESO

— Rishabh Pant (@RishabhPant17) May 13, 2021

بھارتی کھلاڑی کا کورونا ٹیسٹ ایک ہفتے قبل آیا تھا تاہم بھارتی کرکٹ بورڈ نے یہ خبر بھی چھپائے رکھی اور کھلاڑی کی شناخت بھی ظاہر نہیں کی تاہم اب بھارتی کرکٹ ٹیم کا اسٹاف ممبر کا ٹیسٹ بھی مثبت آیا ہے جس کے بعد بورڈ نے ٹوئٹر پر بیان جاری کردیا۔

بی سی سی آئی کی جانب سے ٹوئٹ میں کہا گیا کہ بھارت کے وکٹ کیپر بیٹسمین رشبھ پانٹ کا کورونا ٹیسٹ 8 جولائی کو مثبت آیا تھا جس کے بعد وہ قرنطینہ میں چلے گئے تھے جب کہ اب بھارتی کرکٹ ٹیم کے ٹرینر دیانند گیرانی کا کورونا ٹیسٹ مثبت آیا ہے۔

The entire Indian contingent including travelling family members and caretakers were administered with the second dose of covid vaccine earlier this month in London. To mitigate any further risks, the Indian contingent is taking the Lateral Flow Test on a daily basis. #ENGvIND

— BCCI (@BCCI) July 15, 2021

بھارتی کرکٹ بورڈ نے واضح کیا انگلینڈ میں موجود بھارتی کرکٹ ٹیم کے فیملی ارکان سمیت تمام لوگوں نے رواں ماہ لندن میں ہی کورونا کی دوسری ڈوز لگوالی تھی تاہم مزید احتیاط کے لیے تمام ارکان کے روزانہ کی بنیاد پر ٹیسٹ کیے جارہے ہیں۔
بشکریہ ایکسپریس نیوز