سلیکان و یلی: ٹوئٹر نے اپنے آئی فون صارفین کا دیرینہ مسئلہ حل کردیا ہے، اب آئی فون پر ٹوئٹر کے استعمال کنندہ ٹوئٹس کو براہ راست انسٹا گرام اسٹوریز پر شیئر کرسکیں گے۔ جب کہ اینڈروئیڈ صارفین کے لیے یہ فیچر جلد ہی متعارف کروایا جائے گا۔
ٹوئٹرانتظامیہ نے اس بات کا اعلان ایک ٹوئٹ میں کیا جس میں کہا گیا ہے کہ ’ پلیز اب انسٹاگرام اسٹوریز پر ٹوئٹس کے اسکرین شاٹس پوسٹ کرنا بند کریں، کیوں کہ اب آئی فون کے صارفین ٹوئٹس کو براہ راست شیئر کر سکتے ہیں۔‘
pls stop posting screenshots of Tweets on IG Stories. you can now share Tweets directly on iOS.
-management pic.twitter.com/wpjnElsRTK
— Twitter (@Twitter) June 22, 2021
آئی فون کے ٹوئٹر صارفین درج ذیل ہدایات پرعمل کر کے صرف ایک کلک پر اپنی ٹوئٹس کو انسٹا گرام پر شیئر کر سکتے ہیں۔
1۔ اس ٹوئٹ پرجائیں جسے آپ شیئر کرنا چاہتے ہیں
2۔ شیئر آئیکون کے بٹن پر ٹیپ( کلک) کریں
3۔ انسٹاگرام اسٹوریز کے آئیکون پر ٹیپ(کلک) کریں
انسٹا گرام اسٹوریز کے آئیکون پر کلک کرتے ہی ٹوئٹر ٹوئٹ کےاسنیپ شاٹ کے ساتھ استعمال کنندہ کو براہ راست انسٹاگرام ایپ کے اسٹوری کرییٹنگ موڈ پر لے جائے گا۔ اس کے بعد صارف کو دیگراسٹوریز کی طرح ٹوئٹ میں میوزک ، اسٹیکر، ٹیکسٹ اور بہت کچھ شامل کرنے آپشن دیا جائے گا۔
ایک بار اسٹوری پوسٹ ہونے کے بعد یہ ٹوئٹ صارف کی پروفائل میں دیگر اسٹوریز کے ساتھ ظاہر ہوگی، تاہم یہ صرف اسکرین شاٹ کی طرح ہی کام کرے گی۔ اور شیئر کی گئی ٹوئٹ قابل حرکت اور سائز میں کمی بیشی والے اسٹیکر کی طرح ظاہر ہوگی۔
فی الحال ٹوئٹ شیئر کرنے کا آپشن صرف آئی فون صارفین تک محدود ہے، لیکن توقع ہے کہ جلد ہی اس فنکش کو اینڈروئیڈ فون کے صارفین کے لیے بھی متعارف کروا دیا جائے گا۔
جب کہ ٹوئٹ کو انسٹاگرام اسٹوریز پرشیئر کرنے کا آپشن صرف پبلک ٹوئٹس تک محدود ہے، جنہیں انسٹاگرام کی دیگر اسٹوریز کی طرح کسی ایک فرد،گروپ یا اپنے تمام فالوورز کو بھی شیئر کیا جاسکتا ہے، تاہم استعمال کنندہ پروٹیکٹڈ ٹوئٹس کو شیئر نہیں کرسکیں گے۔
بشکریہ ایکسپیریس نیوز
